29 сакавіка прыгожы юбілей адзначае Сяргей Львовіч Гумілеўскі, беларускі скульптар, прадстаўнік слаўнай мастацкай дынастыі.
Сяргей Львовіч нарадзіўся ў Мінску, скончыў Беларускі тэатральна-мастацкі інстытут, працуе ў манументальнай станковай скульптуры, прымае ўдзел у выставах.
Асоба Максіма Багдановіча і яго творчасць заўсёды былі ў цэнтры ўвагі беларускага скульптара, пачынаючы з дыпломнага праекта. Бацька і сын Леў і Сяргей Гумілеўскія з’яўляюцца аўтарамі праекта помніка паэту, які меркавалася паставіць у Гродна.
Менавіта яны стварылі прыгожы надмагільны помнік Максіму Багдановічу ў Ялце, знак павагі і пашаны беларусаў.
Сяргей Львовіч у адным з інтэрв’ю гаварыў пра Максіма:
“Стварыць такія вобразы-сімвалы мог толькі чалавек, які любіў свой край, сваю культуру, сваю мову…”.
Гэтыя словы ў поўнай меры характарызуюць і самога скульптара, аб чым упэўніцца маглі ўсе наведвальнікі музея М.Багдановіча пад час мастацкай выставы Льва і Сяргея Гумілеўскага “А сэрца ўсё імкне да бацькаўскага краю” (лістапад 2022 года).
Супрацоўнікі Літаратурнага музея Максіма Багдановіча віншуюць Сяргея Львовіча Гумілеўскага з юбілеем! Жадаем плёну ў працы, натхнення і сіл на новыя праекты і творы мастацтва!